政情：孖染疫高官搞衞生陳學鋒爆新冠驚魂

本港疫情復熾，單日確診個案數以千計，中招人數之多，可以話總有一個喺左近。官場當中，政務司副司長卓永興，以及商務及經濟發展局局長丘應樺，兩人尋日雙雙確診，需按衞生署衞生防護中心指引進行隔離。雖則話卓同丘每日有進行快速抗原測試、工作時有戴口罩之類，但近日同佢哋有所接觸嘅人，少不免會感到愕然。譬如議員陳學鋒，前日先至同卓落區視察衞生黑點，估唔到尋日就聽聞卓中招嘅消息！雖然陳自行做快測，顯示並無染疫，但為咗穩陣起見，都有去做核酸檢測，同埋短期內唔會出席飯局或需要摘下口罩嘅場合。

不過，陳學鋒強調自己並非密切接觸者，依然會進行毋須除口罩嘅活動；但係丘應樺兩位下屬，商經局副局長陳百里同政治助理李世華，就被列入密切接觸者而需進行家居檢疫。講番卓永興前日落區視察嘅其中一個衞生黑點，係西營盤正街、高街同第三街之間嘅一條橫巷，陳學鋒同兩位黨友上個禮拜曾經落去拍過片，揭露上址一個好奇特嘅場景，就係同一條橫巷，竟然一邊係乾淨企理，另一邊就污糟邋遢。陳話之所以有咁嘅現象，皆因前者屬公家管理，後者歸私人業權，然而涉及私人業權嘅部分，相關樓宇往往欠缺立案法團，甚至乎單位業主只關心出租狀況，懶理橫巷衞生，結果垃圾雜物不斷堆積，環境日趨惡化，尤其是積壓喺大堆雜物下嘅糞渠爆裂，滲出嘅污水就好似石油咁烏黑！真係睇見都毛管戙啊。

話清潔大行動需「公私不分」

陳學鋒批評，政府喺現場張貼告示同埋發命令畀相關業主，呢種處理橫巷衞生嘅做法並不管用，佢希望政府今次嘅清潔大行動，唔好淨係做公眾地方，否則，全港有一半地方嘅衞生環境係未解決。

議員鄭泳舜前日都有份落區視察，仲要企喺卓永興旁邊添。不過鄭指自己曾經確診，已有一定嘅抗體，而佢做快測嘅結果係冇染疫，但佢都喺社交專頁貼文，祝卓早日康復，又重申落區期間有戴口罩，同遵守防疫規定。講起正街橫巷令人搖頭嘅衞生情況，鄭指紅磡差館里一帶，亦有雜物垃圾堆積、冷氣機滴水、後巷棄置電單車嘅問題，佢建議當局應考慮修訂法例，以便執法。