梁子穎拍片 氣候幻變解謎

鄭楚明解釋，即使已動用到超級電腦，但礙於地球嘅大氣層係一個「混沌」嘅系統，只要輸入電腦嘅資料有少少誤差，就會隨住時間嘅推移而將誤差擴大。問題係觀測資料係無可避免咁存在些微誤差，因此難以做到百分百準確嘅天氣預測。之不過，由於歷年嘅觀測資料大量累積，加上觀測嘅手段又愈來愈先進，其實依家嘅天氣預測較過往準確好多。

講起觀測手段，鄭楚明指天文台百多年前要負責提供觀測授時嘅服務，並於尖沙咀舊水警總部豎起桅桿，當桅桿上嘅時間球徐徐降下，就代表下晝一點，市民就會跟住調校自己個鐘。

然而天文台要決定香港嘅鐘點，當時常用嘅方法係觀測星體經過中天嘅時刻。鄭話時至今日，天文台係以銫原子鐘報時系統作為時間嘅標準，誤差只係每日0.01微秒以內，可以話非常準確。