昔日東方政情：颱風襲港 麥美娟柯創盛夜訪鯉魚門
颱風「馬鞍」襲港掛8號風球，打風就唔好出街，以免有危險。但係有高官同政界人士就夜麻麻走去海濱，仲玩埋Live。竟然做反面教材？唔好怪錯佢哋，佢哋唔係貪玩，亦唔係去睇浪。
觀塘區議會主席柯創盛尋晚9點幾開Live，當時佢好似企喺海濱長廊，旁邊仲有民政及青年事務局局長麥美娟、觀塘區議會副主席呂東孩同觀塘民政事務專員等人。
初時風太大，吹到呼呼聲，根本聽唔到佢哋講乜嘢，風稍停就聽到嘞！原來麥美娟等人夜訪鯉魚門。打大風仲去食海鮮？非也。佢哋係去睇吓啲防水浸設施。
睇防水浸設施 籲關心獨居長者
麥美娟話早幾年「天鴿」襲港，多區水浸，水位曾經到佢膊頭，由於鯉魚門長年受水浸困擾，所以尋日下晝去睇過，渠務署已幫居民做咗擋水板，亦搭咗啲橋，畀市民踩住行，同時仲開咗個臨時庇護中心，畀有需要嘅居民入住。觀塘民政事務專員亦話庇護中心喺下晝已開放咗嘞！
柯創盛話雖然暫時風雨唔係好大，但呼籲市民千祈唔好掉以輕心，要注意安全，麥美娟仲加多幾句，話有唔少獨居長者冇人照顧，希望大家發揮鄰里精神，多啲關心吓啲長者。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
