政情：政府拒增額種禍 長者通宵輪牙科

由於牙科街症嘅名額非常有限，有時會出現有人唔守秩序。周浩鼎話聽排隊嘅街坊講，上個禮拜牙科診所門外先至發生過「打尖」。雖然職員有時會為人龍影相，以確定街坊嘅排隊次序；但如果天氣驟變，半夜落雨，喺牙科診所外排隊嘅街坊就真係慘情啦。佢話曾經向醫務衞生局副局長反映，牙科診所通宵排隊嘅情況，而對方就答應將會喺稍後實施派籌嘅安排，期望新安排可以避免街坊排隊輪候。

但即使當局實施派籌，周浩鼎認為做法只係治標啫。佢認為牙科診所增加服務日數同時段，先至係治本之道，畢竟一個禮拜只得一日為公眾提供牙科服務實在太少，如果加多一或兩日都好吖！佢又提到牙醫嘅人手問題，話目前全港有二千多名牙醫，相對七百多萬嘅人口而言，實在唔理想。佢話針對牙醫不足嘅問題，係咪可以考慮海外引入呢？反正西醫方面，依家都話要從海外引入啦。

佢又話通宵排隊輪候牙科街症服務嘅多數係一把年紀嘅老人家，雖則話手持醫療券嘅長者可以幫襯私家牙醫，但其實私家牙醫收費絕不廉宜，幫襯一次動輒逾千元，加上醫療券金額唔係太多，用咗一次就無喇，所以即使有支援，都未必完全用得着，結果就係基層市民通宵排隊囉！但無論點都好，佢敦促當局盡快採取派籌嘅安排，以紓緩街坊通宵排隊嘅情況；長遠而言，必須增加牙科診所開放予公眾嘅日數同時段，以免「爭崩頭」咁話。