政情：林琳從政之路 始於與男友掟煲

原來林琳從政之前，曾受僱於某銀行。而當時佢喺公餘期間，就應朋友之邀為一啲青年活動擔任顧問，然而搵佢諮詢嘅後生仔竟然一個都無，於是就有人問佢，有無興趣試吓選區議員？而咁啱林琳同拍拖嘅男友「散咗」，深感每日放工之後好得閒、無嘢做，於是就姑且一試。當時屬於政治素人嘅林琳，仲係人生第一次投票，就係投畀自己，結果一參選即成功當選！

雖然林琳笑言，相信前任區議員好懶，佢先至有機會奪得議席，但講到頭一次參與社區服務，佢就感到非常緊張，仲記得當時喺母親節企街站派花，擔心自己無知名度，街坊唔知佢係邊個，但後來見途人都好友善，過程算愉快。

林琳話投身地區工作後，發覺並無想像中咁複雜，其實好多時佢都係扶人一把，提供支援「托一托佢」，並由此同街坊建立聯繫，仲收到唔少致謝信，於是做吓做吓就發覺有好大滿足感。林琳強調社區事務不外乎係勤力「喪做」，有問題盡力解決，即使唔能夠解決所有問題，但只要係有心去做，人家係睇得到。至於依家入咗立法會，睇事物嘅角度就要廣闊啲，畢竟選委會界別係關注整個香港。