政情：人體工學椅齋試唔買 方國珊嘆無碇擺

其實答案又係牽涉到土地問題。話說方國珊見到有展商展出人體工學座椅，於是二話不說就立即試坐。當佢坐上座椅繼而較低椅背嗰一刻，即不禁發出「啊」嘅愜意聲音，其通體舒泰，飄然若仙嘅感覺可謂溢於言表。跟住佢就話返到議辦，其實都好想有一張咁嘅座椅，但可惜地方實在太細，擺唔落。其後佢試坐另一張座椅，雖然感到心儀，但礙於地方逼狹嘅現實，惟有得個「恨」字囉。

後來方國珊見到另一個展商嘅人體工學座椅，大讚外形靚，定價相宜，之但係都係嗰句，無地方、擺唔到、唔使諗，仲呼籲街坊唔好送畀佢。除非佢有另一個新嘅議員辦事處，仲要地方夠大喎。但恐怕呢個期望就未必咁容易實現到喇。