昔日東方政情：7月就任副局政助 利益申報仍蹉跎
新一屆政府上任至今約兩個月，同樣喺7月1日委任嗰6名副局長同政治助理，全數上任逾一個月，但網上仍未見利益申報，仲遲過佢哋嘅上司喎，點解拖咁耐呢？特首辦回覆話處理緊副局長嘅申報，處理完畢就會上載喎。
上屆政府有4名副局長同兩名政治助理過渡到新一屆政府，佢哋都喺7月1日宣誓同埋喺當日履新，包括商務及經濟發展局副局長陳百里、財經事務及庫務局副局長陳浩濂、勞工及福利局副局長何啟明同政制及內地事務局副局長胡健民，兩名政助就係財庫局嘅葉俊廉同民政及青年事務局局長政助張進樂。
另一批就係7月22日委任嘅8名副局長同11名政治助理，佢哋大部分都喺7月25日履新，體育及旅遊局局長政助招文亮就喺8月8日返工，運輸及物流局局長政助陳閱川就喺8月15日履新。另外仲有個別政策局未齊腳，即係仲未有副局同政助人選。
拖近2個月 政府話處理緊
但係喺7月1日履新嗰6個副局同政助，佢哋嘅利益申報拖咗近兩個月都未見有，喺財庫局網頁嘅利益申報嗰欄，只有局長許正宇嘅最新利益申報，而副局陳浩濂同政助葉俊廉嗰份利益申報都未更新，竟然仲係舊年嘅申報資料，即係舊料喇！返工未夠一個月嘅第二批副局同政助亦等而下之，佢哋嘅利益申報自然未見影。
話時話，包括特首、3名司長同3名副司長，以及15名局長嘅行政會議官守成員，同埋非官守成員，佢哋嘅利益申報資料8月11日喺網頁上載，以佢哋喺7月1日上任，應該喺一個月、即係8月初就要公開，但佢哋都已經遲咗約半個月，勢估唔到班副局同政助竟然仲遲。
點解拖咁耐？本報向特首辦查詢有關事宜，特首辦回覆話處理緊副局長嘅申報，當處理完畢就會喺網頁上載相關資料，未能告知幾時先有得查閱。之不過，首批副局長、政助同所有局長一樣，都係喺7月1日履新，因乜嘢要搞咁耐呢？有幾咁複雜呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
