政情：議員新丁男團出道 為長者開騷

呢隊男團喺藍田出道，喺一個長者音樂會擔任表演嘉賓。佢哋同小鮮肉扯唔上關係，但全部都係立法會嘅新鮮人，呢隊「跨黨派男團」係「新丁擔當」，包括管浩鳴、梁熙、陳學鋒、李鎮強、梁毓偉同顏汶羽。梁熙喺社交平台貼文，話呢隊未命名嘅男團事前從未夾過，出道首次表演就唱咗《朋友》同《真的愛你》，佢話平日嗌咪多，揸咪練歌少，自己唱細聲啲做和音擔當，以免影響整體表現，而李鎮強就係「氣氛擔當」。

佢覺得觀眾嘅反應唔錯，事關見現場觀眾都冇咩人去廁所，所以已經相當滿足嘞，仲話希望下次仲有機會再合作。佢仲話台上嘅鼓手係佢大學室友，室友仲叫埋爸爸嚟彈結他，為長者帶來快樂嘅周日，大讚呢個親子活動唔錯！

其實，佢都係唱得之人，話說早幾日佢喺社交平台貼文，話返咗母校聖若瑟書院睇歌唱比賽，仲話勾起唔少校園回憶。佢話喺美國讀大學時曾玩音樂、拍MV，雖然最終冇追夢向演藝事業進發，但呢個夢其實喺中學時已萌芽，又話仲記得當年讀中四，都有參加校內嘅歌唱比賽，當年仲打入最後10強，有幸踏上禮堂舞台，唱出張惠妹嘅《原來你甚麼都不要》。點解要揀呢隻歌？唔通佢當時失戀？