政情：東涌居民捱貴菜 葉劉叫何永賢整改

話說葉劉早幾日喺東涌嘅逸東二邨開咗個地區辦事處，開張之後原來仲有下半場。葉劉話經常收到當區居民投訴滿東邨街市規模太細，攤檔餸菜種類極少、日用品商店唔齊全，所以寧願去遠啲嘅逸東邨街市買餸。佢話之前視察街市只有一檔豬肉檔，連牛肉檔都冇，今次再去發覺竟然連海鮮檔都唔見埋，水電工程同雜貨店亦幾近絕迹，成個街市最少有一至兩成係「吉舖」。

葉劉話雖則滿東邨街市嘅價格便宜啲，例如豬肉檔柳梅一斤只售80幾蚊，其他街市最少都要逾百元，但檔主同居民都話喺咁少選擇嘅情況下，幾平都冇用。

反觀逸東邨街市，人流就多嘞！葉劉話記得領展最初開設逸東邨街市時以「香港街市」為主題，攤檔種類多，仲有茶餐廳同大牌檔等，令街市一度成為旅遊熱點，但依家街市已外判咗畀另一集團經營，雖然都係好旺場，但大部分檔攤檔主都反映租金太高，雖然近年因疫情經濟轉差，但攤檔反而加租，又因失業率高企令市民消費力減弱，攤檔生意好差，反映居民買貴餸、攤檔租金高嘅苦況。

葉劉話當面向何永賢講，滿東邨街市外判同單一承辦商營運，導致欠缺競爭力，所以服務質素自然參差，建議街市需要引入更多競爭。佢引述何話滿東邨同東涌港鐵站之間搵到一處合適地方，可以設置一個30至40檔檔攤嘅臨時街市，預計明年開始運作，希望可以紓緩依家滿東邨街市嘅惡劣情況，而臨時街市餸菜價格相對便宜啲，加上有質素服務嘅話，就會對逸東邨街市造成壓力，咁逸東邨街市物價或者有機會稍微降低，而營運商就唔敢亂咁加租。

究竟喺臨時街市開咗之後，係咪可以令居民唔使捱貴餸？葉劉都話要拭目以待。