政情：潘佩璆話長歎冷氣 增中暑危機

潘佩璆指幾乎每逢周末或假日，都傳出有人中暑甚至死亡嘅新聞。佢話記得童年時代，甚少聽聞有人中暑嘅消息。雖然佢唔排除地球暖化，氣溫愈趨炎熱，但人體適應環境溫度及高度嘅能力，亦都係不能忽視嘅因素。佢憶述1985年3月到倫敦參加精神科專業試，即使穿上外套同身處室內，依然冷得發抖，但過咗兩日就適應低溫環境，唔覺得冷；跟住佢就將場景移番香港，指十多年前每日都會練跑，而每年夏天第一道熱浪來襲時，長跑中途會感到有啲頭暈、乏力，以及一股反常嘅涼意，佢意識到係預警中暑嘅徵狀，立即停步同飲水，然後打道回府，一個星過後再度練跑，就唔會再有呢種感覺，整個夏季都係咁，直至翌年第一場熱浪再次來臨。

至於近年新聞報道嘅中暑個案，多數係假日遠足或進行其他戶外活動所發生。佢推測中暑嘅市民平日喺冷氣間工作居多，收工返到屋企都係空調長開，以致冇機會適應氣溫變化，結果周末參加戶外體力活動，就會被酷暑所傷。