政情：唔怕被搶綽號 鼠王芬盼多啲人做

梁美芬尋日喺社交平台貼文，回應「老鼠王」稱號嘅熱話之外，仲話喺從政之前，佢係大律師及大學教授，唔少朋友都唔鍾意「鼠王芬」呢個花名，甚至替佢不值，認為呢個稱呼貶低咗佢。

畀人嗌咗咁多年「鼠王芬」，梁都好受落嘅，仲記得當年佢仲自掏腰包印製《滅鼠天書》派畀街坊添！佢又認為議員因跟進民生議題而得到綽號，即係工作受到市民嘅肯定，反映市民記得議員肯放下身段，貼地跟進過鼠患問題。佢仲話官場政界每多一個「鼠王」，就代表有多一個官員及議員願意切實排解民生憂難，係好事嚟，最好區區都有「鼠王」添。