政情：罕見病患乏支援 陳沛良要求討論

陳沛良話醫治罕見病涉及龐大嘅醫療開支，藥物相當昂貴，就連中產人士都難以負擔，認為當局應該為病人提供更多支援，幫助罕見病患者。佢提到，由於內地藥廠較多，採購藥物成本較低，若本港能夠一同前往採購，藥物成本將會減少六至七成，先能夠實際幫助該批病人。除咗委員會討論外，佢亦將喺政府新一份《施政報告》諮詢中建議當局增加援助。

另一樣會喺《施政報告》諮詢時建議嘅則係內地設立保險售後服務中心。從事保險業嘅佢話有關計劃一直只聞樓梯響，未知何時出台。佢形容，疫情下內地保單已完全消失，現時就連以往在港購買保險嘅內地客要繳交保費都困難重重，保險業界希望在內地設立客戶服務中心，讓該批人唔使親自來港交保費，早前更傳出選址深圳前海、珠海橫琴或廣州南沙3個地方，但至今未有下文，佢認為相當急切，應盡快落實設立。

唔少選委界議員都喺地區設立辦事處，佢亦將於下月底至10月初，同九龍東直選議員鄧家彪設立聯合地區辦事處，選址秀茂坪。佢解釋，原因係自己保險公司同九龍東有較多聯繫，而原定鄧家彪係同選委界前議員林智遠孖住一齊開，但隨林智遠轉跑道，孖頭嘅對象就變為陳沛良喇！