政情：前廳交流會 議員埋怨 如街市賣菜 時間又短

議員張欣宇話，今次交流會第一節約45分鐘，先由政務司副司長卓永興簡介「衞生黑點問題」，然後議員可以舉手發問。佢認為安排相當不便，事關拎咪嘅議員發言時，全場人只可以聽，直言係嘥時間嘅做法，倒不如直接分組，等議員可以同其他司局長多啲交流。議員梁文廣就話到第二個環節，即係自由發言時段都係得番35分鐘。佢又話一啲好資訊性嘅內容，平日同官員接觸都可以了解到，仲舉例呢幾日落區了解衞生黑點之後，有啲嘢想即刻反映番，唔係想順來順往咁討論。

對於交流會係咪好嘈吵，議員李鎮強就話，某程度係聲量問題，皆因前廳空間較為寬敞，所以安排有兩至3支咪，仲有個俗稱「小露寶」嘅揚聲器。之但係，有部分人坐得近會覺得好嘈，坐得遠嘅就容易聽唔清楚喇。雖則多位議員投訴話唔夠時間傾，但聽聞政府曾打算將交流會延長到兩個鐘左右，之但係都要平衡番開會嘅時間咁喇。

其實都仲有好多議員不滿，有人質疑舉手發言冇用，更透露情況一度成為「自由搏擊」，大家插嘴、唔排隊，同時認為官員一個月先至嚟交流90分鐘，始終唔夠喎。另有議員形容係「街市賣菜」，話幾十個議員同11位官員傾偈，基本上都係鬥大聲，有時根本都聽唔到官員嘅答覆添。唔單止咁，有議員笑言似「簡布會」，認為交流會一開波，官員毋須用十幾二十分鐘簡介內容，皆因每個議員所關注嘅議題都唔同呀。