政情：疫下滯海外 非中國籍港人恐失居留權

法律界議員林新強指長達3年嘅疫情，對一啲身處海外嘅非中國籍港人，不但構成回港嘅障礙，更有可能失去永久性居民身份。林話會趁住今日立會前廳交流會嘅機會，向政務司司長提出建議，以免人才流失。

其實選委界議員梁美芬去年9月亦已提過相關問題，而保安局書面回覆指有酌情空間，會考慮該個案嘅情況。之不過，本港嚴格嘅防疫政策，對於好多身在海外嘅非中國籍港人而言，親身回港無疑要付出金錢同時間嘅代價，林新強早前到訪新加坡，曾接觸當地嘅非中國籍港人。林認為政府不宜墨守成規，建議應容許佢哋網上辦理手續，以免成為香港人才流失嘅另一道缺口。林慨嘆話，香港拱手讓予新加坡嘅黃金機會實在太多啦。

雖然林新強屬於功能界別，但佢打算喺元朗老家開設地方辦事處聽納民情，並招攬有意服務社區人士，同時利用法律專長協助街坊。辦事處預計喺9月尾或10月頭開幕。