政情：掌選管會13載頻甩漏 馮驊冇得留低

政府尋日發出新聞稿公布馮驊任期屆滿，亦讚揚佢盡心服務選管會，建樹良多，又話選管會喺馮驊領導下，本港過去一年3場重要選舉，即選舉委員會界別分組選舉、立法會選舉同行政長官選舉，都係喺公開、公平同公正下進行，成績斐然。

之不過，喺馮驊任內嘅多場選舉確實甩漏多多，屢受批評。譬如2016年立法會選舉同2019年區議會選舉，投票安排失當招來大量投訴。舊年選舉委員會換屆選舉，即使選民只得4,380人，創下該選舉歷來最少投票人數，但點票時間竟長達10多小時！

處理選民資料亦有失誤。正如喺2016年嘅立法會選舉，新界西一個投票站遺失一本載有逾8,000名選民資料嘅選民登記冊，仲要事隔兩年多，先至公布事件同報警。喺2017年特首選舉，選舉事務處職員喺亞洲博覽館遺失兩部手提電腦，內有1,200名選委同全港378萬名已登記選民個人資料。但選管會就話事件「實屬不幸」，以為「側側膊」就可以過骨，但申訴專員公署曾批評選舉事務處職員因循大意，又指管理層監督不力，理應為事件承擔責任。