政情：教大校園見 議員感慨懷緬

3名校友議員包括林振昇、郭玲麗同陸瀚民，由教大校長張仁良、兩名副校長李子建同陳智軒做「導遊」，首先講解咗教大嘅最新發展，之後再參加未來教室，呢個教室配備有全港最大嘅VR CAVE教學系統之一，設有360度互動式4面同地面投影裝置，以科技結合教育，提升學習效能。此外，教大即將動工興建樓高8層嘅新教學大樓，亦配備一系列教研設施。

參觀之餘，佢哋仲去學生餐廳同班師弟妹一齊食晏，了解班師弟妹喺疫情下嘅學習同教學實習情況。陸瀚民話想當年，佢都係接待訪校來賓嘅「學生代表」之一。仲記得林振昇講過當年喺教育學院畢業後，最終冇做小學老師，之後喺工會營辦再培訓課程同其他成人教育課程，佢話都算學以致用。

林振昇當年喺教院修讀學位教師教育文憑（小學）、郭玲麗曾修讀小學教育證書（中文）同教育榮譽學士（特殊需要），至於陸瀚民就曾修讀語文教育榮譽學士。