政情：政界現疫潮劉國勳中招

疫情繼續停不了，仲有蔓延情況添！其中立法會同政府人員尋日增加4宗確診個案，包括新界北議員劉國勳、紡織及製衣界議員陳祖恒嘅辦事處職員、醫務衞生局政務助理同埋環境及生態局局長新聞秘書許曉斌；至於兩名局長盧寵茂同謝展寰則冇染疫，行政署署長盧世雄亦因同過初步確診人士接觸，正居家檢疫，而盧尋日亦做咗快測，結果係冇感染病毒。

盧世雄要居家檢疫

劉國勳喺上周五返回立法會綜合大樓，主要逗留喺6樓議員辦事處，一直有戴口罩，佢依家已居家隔離。另外，陳祖恒嘅議辦職員亦確診，嗰個議助亦喺上周五返回立法會工作，一直有佩戴口罩，無同議員見面，而立法會累計有340宗確診。

至於該名確診嘅醫衞局政務助理，當局指佢喺工作時有佩戴口罩同遵守有關防疫措施，最近無外遊紀錄，而最近一次上班日期係上周二；許曉斌同樣無外遊紀錄，最近一次上班日期係上周五。