人才流失林大輝盼政府穩軍心

大學聯合招生辦法（JUPAS）嘅遴選結果早前已經公布。根據JUPAS公布嘅數字顯示，今年有39,523人申請聯招，較去年減逾千人，再創文憑試以嚟最少！除咗學生人數少咗，有中小學仲出現教師流失嘅情況。林大輝中學校監林大輝，尋日出席活動時，就坦言每個行業都有人才流失情況。而同場出席嘅珠海學院校長李焯芬，就指今年收生收得非常好，不過佢主要係講學校嘅碩士課程。

珠海學院碩士收生增加

有關教師離職嘅情況，議員鄧飛早前就問過教育局。數據顯示2021至22年度嘅直資或公營學校嘅教師流失率（臨時數字）分別達8.4%及7.5%，教育局指數字略高。林大輝承認其學校都有呢個問題，認為係香港中小學普遍面對嘅煩惱。林大輝表示不少老師流失，對學校嘅教與學穩定性有影響，希望教育局推出政策幫助學校穩定軍心，令到教師留任。

林大輝又指，其他專業範疇嘅行業亦都同樣遇到人手流失，可見問題並非局限於教育界，而係整個大環境嘅現象。林認為政府應該要令到各行各業嘅人士，相信留喺香港發展可以令佢哋安居樂業，先至有落地生根嘅意向。

至於李焯芬，就指珠海學院每年嘅碩士生人數都上升得好快，今年更大幅增加，冀碩士課程將來會愈開愈多，但未提及學士課程嘅收生情況。