政情：見美食心軟 林健鋒使凸消費券

林健鋒尋日喺社交平台貼文，話拉埋老友、立法會主席梁君彥一齊去美食展。雖然冇得試食，但都冇影響市民掃貨嘅心情，林健鋒都買咗唔少嘢，包括西班牙風乾火腿同黑松露菌醬、牛肝菌濃湯同韓國米酒等。咁多嘢，幾錢找數？佢話加加埋埋消費額約5,000元，已經「使凸」咗消費券喇！

對於政府一方面將抵港檢疫放寬至「3+4」，但另一方面就實施「紅黃碼」，黃碼人士喺4日醫學監察期內禁止進入亞博、會展等嘅表列處所。林就期望政府能夠以民為本，放寬有關安排，畀醫學監察期間嘅入境人士，喺佩戴口罩嘅前提下，能夠進入展覽場地等處所。