政情：容海恩同老爺擘面 袁彌昌：冇家變

袁彌昌喺報章撰文，指前年爸爸「出走」，已預料到今日嘅事態發展，冇乜好驚訝。佢又話：「對於妻子登報與袁爸爸脫離關係，我固然是一早得悉，但也懶得通知袁爸爸，因為我清楚他一定了解現時香港建制政治的遊戲規則——表態是需要的，滅親倒也不必。」仲叫大家毋須大驚小怪。不過，佢話事件令人擔心香港社會「文革化」，人人寧左勿右、急於表忠，慨嘆此舉無助香港社會重新出發、重新團結社會大多數。

保安局早前點名緝捕喺海外籌組「香港議會」嘅袁弓夷，指佢涉嫌觸犯《港區國安法》嘅顛覆國家政權罪，而容海恩上周五登報，話本着「國之大義」同袁弓夷斷絕「爺媳」關係。事後袁弓夷亦喺網台直播中，話昔日「休新抱就聽得多」，豈料依家竟然掉番轉！但佢相信容刊登聲明，目的係保護自己同家人，話做法「有智慧」，呼籲大家切勿言語攻擊容海恩。