政情：許智峯悉尼遇襲 遭潑水鬧人渣

日前網上傳出，有人目睹許智峯喺悉尼嘅餐廳內同友人聚餐會面，期間許身後有一位男士突然站立，向許潑水同大叫「人渣」，又話若非現場人數眾多，早已攻擊許，之後相關人士同相信係佢太太嘅女士離開餐廳，但其後相關人士又獨自折返，將手搭喺許膊頭，話下次再見到許的話，就對許不利。餐廳職員見狀立即上前調停，要求該男子離開。

許智峯尋日喺社交平台貼文，話自己作為政治人物，因為政見唔同，過去都遇過類似嘅情況，都盡量不回應不糾纏，以免衝突升溫，以及盡量保護身邊人，同埋唔會對事件介懷，但就認為今次係涉及直接襲擊及威脅使用暴力，已經分別向當地警方、澳洲聯邦警察、澳大利亞安全情報組織及澳洲國家安全部作出舉報。