政情：何永賢訪過渡屋 住客求上樓加速

政府喺去年4月推出「過渡性房屋賓館計劃」，資助社福機構租用酒店及賓館作過渡性房屋，然後再出租予有需要市民入住。

之不過有住戶擔心，兩年營運期一旦屆滿，相關酒店或賓館不再同社福機構續約，而自己又未上到公屋的話，咁就會無處棲身，要瞓天橋底啦！有份去視察嘅議員陸瀚民，就話佢尋日接觸到嘅住客都比較樂觀，唔擔心呢件事，強調立法會「唔會容許呢件事發生」。陸認為酒店或賓館嘅過渡性房屋，短期內可以幫助基層市民嘅居住需要。況且，由社福機構做「二房東」，一旦遇上物業管理問題住客都會有求助對象，陸瀚民希望政府可以提供更多金錢誘因，促進公私營合作。

議員盧偉國就問過啲住戶，如何得知過渡性房屋，答案大多都話朋友介紹或者社工轉介。盧就覺得政府應加強過渡性房屋嘅宣傳，令到基層市民輪候公屋期間，可以住喺一個比較好嘅環境，而毋須屈居喺不適切房屋。

議員又到土瓜灣探訪劏房戶。議員李鎮強話見到劏房裏面，住咗帶住兩個小朋友嘅媽媽，環境實在侷促，但幸好即將搬去過渡性房屋居住。李鎮強認為當局應該加快改建荒廢校舍，及利用組裝合成嘅方法，盡快提供更多過渡性房屋。講起組裝合成，前日何永賢到訪元朗，參觀房協首個洪水橋專用安置屋邨，而呢度就係用咗新技術組裝合成建築法，興建三百個資助出售房屋單位，不但提升建屋質素、縮短工期，亦可減少工程廢料。