政情：落車發現冇口罩 黃傑龍發晒茅

話說Simon日前喺社交平台貼文，劈頭就話「好兇險、好兇險」。乜嘢咁兇險？佢話啱啱坐私家車去中環，因為喺中環落車好緊張，落咗車一秒之後感覺點解好似冇咁辛苦，原來佢唔記得戴口罩，個口罩漏咗喺車裏面，跟住佢大喝一聲希望架車停番低，點知失敗咗，架車轉眼就走咗。

Simon話嗰一刻嗰種無助，直頭心諗準備5,000蚊罰款㗎喇，但佢都四圍望睇吓有冇便利店，或者有邊度地方有機會有口罩賣，點知就見到間「X旅巴士」，就膽粗粗走入去大叫救命，問可唔可以賣個口罩畀佢？點知「店員」二話不說攞咗個私伙口罩畀佢，佢再問一句確認：「唔收我錢？」店員擰擰頭叫佢走，當時佢直頭鞠躬，兼大聲講「多謝晒、多謝晒」。真係避過一劫喎。

呢個Post出街之後，好多網友都戥佢好彩，亦有唔少網友話佢打錯字，事關佢求救嗰間明明係巴士，畀口罩佢嘅應該係車長，而唔係店員。佢就澄清話講嗰個「X旅巴士」唔係一架巴士，係一間店舖， 所以佢講「店員」並唔係打錯字。佢又話點解佢唔開舖頭全名，係因為佢唔想店員受到上司嘅不必要壓力喎。