政情：去完西九翻尋味 梁美芬同媽咪睇粵劇

Priscilla喺社交平台上載咗張相同貼文，原來佢今次唔係去參觀，而係買飛入場睇新式粵劇，重點係帶埋90幾歲嘅媽媽一齊去睇。睇落佢媽媽都好精神，隔住口罩，都睇出佢笑緊。佢話媽媽對音樂粵劇好期待，咁啱戲曲中心上演緊一套3D音樂劇，於是就同媽媽去睇，一睇就睇咗3粒鐘。

呢套係音樂粵劇，佢形容劇中有唔少創作係以香港人成長時耳熟能詳嘅歌曲為基礎音樂，令觀眾產生好大共鳴。佢仲話喺疫情下，唔少演出要腰斬或擱置，對演藝界打擊沉重，所以叫大家如果見到感興趣嘅演出，記得要及時入場支持喎。