昔日東方政情：辭任哥球會會長 梁宏正避輿論硬仗
民青局唔管體育事務 建屋爭議翻煲
對於上屆政府提出收回粉嶺高爾夫球場32公頃用地，而當中只有9公頃用作建屋，近日又再惹起爭議。有部分人認為該地有高生態保育價值，而且作為建屋嘅用地狹小，房屋供應有限，而香港哥爾夫球會亦反對收地。原來梁宏正喺政府公布委任佢做民政及青年事務局副局長當日，就辭咗該會會長一職，唔知係唔係為咗避免利益衝突？
民青局發言人回應查詢時話，梁宏正喺出任民青副局長前，即7月25日前，已經辭去哥球會會長一職，仲話改組後嘅民青局唔再負責體育事務，所以辭職唔關利益衝突事，只係想專注政府工作。
睇番哥球會嘅網頁，暫時由副會長郭永亮擔任署任會長。郭回應我哋查詢時話梁以私人理由辭去會長一職，要專心從政咁話。佢亦相信梁加入政府，由於職務範圍唔同，唔會影響收地。哥球會下月會舉行周年大會，屆時會選出新任會長，郭又透露暫時未有人表示有意出選會長。
值得留意嘅係，網頁中歷任會長嘅名單，暫時見唔到梁宏正嘅名。該球會發言人回應話梁宏正喺7月22日辭去會長一職，球會9月會舉行會員大會，選出新一屆會長，而網頁就會喺會員大會後更新網頁上嘅有關資料。
照咁聽落，梁宏正個名唔係「被消失」，會員大會之後就會出現喺歷任會長嘅名單之中。
任內曾多次為高球場護航
由於過往唔少民主派人士都強烈要求政府收回粉嶺高球場用嚟起屋，而當時梁宏正亦多次為高球場護航，曾話粉嶺球場不但為本地培育高球手，更孕育着好多珍貴動植物，當中包括「極度瀕危」嘅野生水松樹、受法例保護嘅裳鳳蝶、豹貓、赤麂等，球會仲舉辦自然教育徑導賞團，畀年輕人近距離認識香港動植物嘅多樣性同生態價值。
北區區議會亦曾討論過高球場收地建屋事宜，有區議員覺得該地生態價值高，批評當局嘅環評報告係「不堪入目」；亦有區議員狠批政府「有冇用腦諗嘢」，皆因粉錦公路交通擠塞問題嚴重，咁多年嚟都無法解決，推算高球場公營房屋建成後，會令到該地交通安排更惡劣，大雨時水浸情況都會加劇。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
