政情：符傳富傳想做副局

Mark喺2017年獲委任為運房局政治助理，5年過去，新一屆政府首批委任名單上，不見其蹤影，惟運輸及房屋局分拆出嚟嘅運輸及物流局同埋房屋局，兩個局都已經齊腳，副司長同政助均已有人選，只係人選並非Mark。有消息指，佢希望更上一層樓做副局長。

睇晒咁多個局，有空缺而又適合佢嘅似乎剩下發展局，而發展局副局長同政治助理都未有人選，究竟佢能否「升呢」做副局長，就要拭目以待。畢竟多個建制派政黨喺新一屆問責團隊中，無論喺局長、副局長同政助嘅人數都有進帳，目前只有財經事務及庫務局副局長陳浩濂續任，故外界尤其關注同為自由黨嘅Mark，會唔會繼續留喺政府，咁將會直接影響該黨嘅政治能量。

實際上，亦有多名上屆政助同樣去向未明，包括勞工及福利局政助馮興禮、保安局政助劉富生、環境局政助區詠芷、發展局政助馮英倫、食物及衞生局政助鄭守崗，同埋商務及經濟發展局政助馮海容。當中劉富生、區詠芷同馮英倫均做咗兩屆、即係做咗10年政助，現時仍未有着落。而同期加入嘅教育局前政助施俊輝，就獲委任為新一屆教育局副局長。

當然，亦有做咗一屆政助，隨即升官嘅，創新科技及工業局副局長張曼莉就係最好嘅例子，佢同樣喺2017年獲委任為創科局政治助理，5年時間一躍成為副局長。