政情：區議員唔熟地區 葉劉話委任制可取

區議會經歷宣誓風波同辭職潮，好多區議會都只係勉強運作，政府更形容係「殘缺不全」。葉劉就話希望重組區議會，指舊年選立法會時，發現無咗區議員後，好多環境衞生嘅議題都無人跟進，有區議員跟進會好好多，佢仲指有市民投訴，有好多區議員完全唔知地區環境。至於喺改革上，葉劉指區議會過去設有委任議席，畀熟悉地區事務嘅人可以加入，佢亦認為應該保留部分民選議席，確保區議員同市民有緊密接觸。之不過，佢亦強調區議會將來嘅發展需符合《基本法》提及嘅區域諮詢組織定位。

至於即將卸任立法會財務委員會主席嘅陳健波，近日話有新人經常將地區議題帶入議會，葉劉就指無可避免，又話好多市民都要求佢反映地區問題，佢強調只要議員喺反映地區意見嘅時候，唔好忘記社會整體利益就得。