政情：張欣宇父子入竹篙灣 話空間有限生活簡單

張欣宇尋日喺社交平台貼文講咗細仔喺前日確診嘅消息，亦有講到佢同大仔喺隔離營嘅生活。係咪日子難過？又唔係喎。佢哋入咗營4日，佢就跟住好似數白欖咁，話每日量度體溫血氧、申報健康、食藥同食飯、幫囝囝沖涼、同太太及細仔細女視頻，時間眨眼間就過咗嘞！

呢幾日同大仔朝夕相處，佢初時都擔心「三無」日子，即係無興趣班、無課外活動、無玩具消遣嘅7日裏面到底會點？而喺入營後就發現，即使喺一個有限的空間，兩父子一齊睇吓故事、畫畫同傾吓偈咁簡單嘅生活，自娛自樂，已經其樂融融。佢仲話入營翌日係大仔嘅生日，呢次係隔離營過嘅生日，大仔都話好難忘。