政情：巴士站無蓋勁辛苦 田北辰要追瘦政府

呢條新港鐵巴士線，15至20分鐘一班，由屯門和田邨開出，經菁田邨、紫田村、屯門市中心、屯門市廣場及新墟街市等地，再返番菁田同和田邨。

雖然之前出過黃雨，但近日又變番烈日當空，企喺度等巴士都好辛苦，田二少話附近想搵個地方遮一遮都冇，佢企喺度幾分鐘都已經曬到燶，如果喺度等10幾分鐘一班車，真係唔敢想像。

佢話班街坊有老有嫩，話坐喺車上邊就又快又涼冇得頂，但一落車企喺度幾分鐘已經暈暈哋。田二少仲反問有乜理由巴士路線就已經開晒，但係巴士站上蓋一個都仲未有呢？

田二少話，據了解嗰度嘅巴士站上蓋部分由港鐵同城巴一齊起、一齊用，九巴就自己起，而佢哋亦都話隨時開得工，係等緊運輸署同地政署嗰邊批開工。佢尋日問在場嘅相關部門同事進度，佢都畀唔到時間表，連幾時批都答唔到，咁樣又點做到特首所講嘅重民生，以結果為目標呢？佢講到明會必定去信追到瘦政府，要求加快進度，等居民等車嗰陣唔使再受好天曬落雨淋之苦。