政情：倡委員會主席新丁上位 陳健波「表現差拉落嚟」

由於有4名選委會界別嘅議員「轉跑道」加入「熱廚房」，陳健波獲委為行政會議成員，主動話會辭去財委會主席一職，所以財委會連帶多個委員會都要重選主席。初步估計，呢幾個委員會主席都會由舊人做。陳健波喺電視台節目時話以前要完成一屆任期先算係舊人，先可以擔任主席，佢覺得呢個情況都需要改變，可能任期過咗一年，觀察一吓邊個人能力較高，就畀佢哋擔任主席，反而要將表現不佳嘅人就拉落嚟。

回顧做咗7年財委會主席，佢話昔日喺財委會要面對民主派嘅攻擊同拉布曾經「火燒心」，又重提當時血壓飆升，話主持會議過程好辛苦，幾十歲人未試過爆血管，但當時有一年，開會開到一半，眼球有一點血紅色，完會後發現爆開至整個眼球。值得一提嘅係當年喺泛民主派拉布下，遲遲未能選出內務委員會主席，最後立法會主席引用議事規則指定陳健波主持選舉，當時喺極度混亂下，終於選出內會主席。

至於喺「新時代」嘅議會亦有新挑戰。佢認為新議員亦想監察政府，所以睇到佢哋都好落力，但點樣平衡係一個問題，因為佢哋好多時將地區議題帶入議會，因為佢哋好多都係做地區工作，未必明白全港性嘅問題，而喺身份上有改變，立法會同區議會唔同，所以重點亦有所不同。

話時話，上屆財委會喺舊年修改會議程序，喺工務或人事編制小組委員會已討論過嘅撥款項目唔能夠再喺財委會討論，除非得到3名議員聯署同過半數委員同意。主持人更提及修改後嘅會議程序係當時要嚟防民主派拉布，但今時今日實行起來又覺得太嚴苛，係咪搬石頭砸自己腳？佢就話其實喺最差嘅時候，會議時間好長，當時曾作出好多修改，而喺今時今日嘅環境未必需要咁嚴苛，但即使喺依家咁嘅架構下，呢啲只係用嚟守住最後關口，始終係全新嘅規則，通過咗只係維持咗半年，唔會咁快再更改。邊個接任財委會主席？暫時以副主席陳振英嘅呼聲最高，如果最終只係得一個人獲提名，就會自動當選，否則將喺8月5日進行選舉。