政情：街站曬到乾 李世榮現中暑徵狀

身為地區直選議員，李世榮話就算立法會放暑假，都要落區接觸市民。前日下晝一點，佢就去到耀安邨設街站向市民派發抗疫物資。佢話企街站期間身體並無不適，只係覺得好熱，離場不久就開始頭脹同頭痛，雖然立即食止痛藥，但去到夜晚仍然有唔舒服。佢話經此一役，下次企街站會留意地點，又或者揀日照冇咁盛嘅時間。

李世榮又話包括佢自己，好多人嘅特區護照都過咗期，不過早前佢就已經辦理續領，而尋日佢就去到將軍澳健明邨，呼籲市民前往停泊喺上址嘅入境處流動服務車，趁早續領特區護照。佢又話該服務車可以免費幫市民影埋相，夠晒方便，但可惜只能以信用卡支付續領護照嘅費用，而唔收現金或八達通，就略嫌美中不足。