政情：立會餐廳即將轉手 梁君彥拉隊開飯念舊

尋日有份到立法會餐廳食早餐嘅議員，除張宇人同陳振英，大部分都係經民聯黨友，當中仲包括兩位久違嘅前議員張華峰、石禮謙，至於秘書長陳維安都有到場。梁君彥話，餐廳營運商多年來竭誠服務，為議員、助理、秘書處同事、傳媒朋友等大樓使用者提供「醫肚」聚腳地，口碑良好，唔少喺政總上班嘅朋友都會專程嚟幫襯。餐廳員工對好多議員、熟客嘅飲食喜好更瞭如指掌。然而過去兩年疫情嚴峻以致艱苦經營，最終決定不再續約，佢同好多議員及職員都感到非常可惜。

梁又指，今天起餐廳會暫停服務。新營運商接手之後，餐廳將會擴大並增設議員專區。秘書處會與新營辦商及建築署緊密協作，盡快完成裝修工程，冀餐廳不遲於今年10月初重新提供服務。