政情：林超英 戥工友淒涼 撐中暑列工傷

林超英指曾經有一段時間，天文台留意到一個現象，就係攝氏32度嘅氣溫，撳平安鐘嘅數字唔會有咩波動，但一過咗33度，每日撳平安鐘嘅數字就會上升，換言之，人體適應氣溫係有臨界點，一旦去到33度或以上，長期病患者就開始頂唔順。跟住佢又話，拉勻全個地球嚟計，今日較200年前升咗約1.2度。雖然幅度睇落唔係好大，但本應夏天嘅33度，依家升到34度幾，剛好去到「頂唔順」嘅界線。結果以前約莫32度嘅日子大家唔會覺得太熱，依家動輒都超過33、34度嘅氣溫，好多人都話頂唔順嘞。況且，酷熱天氣同熱夜嘅日數亦因此而延長，佢話天文台過去曾預測去到2050年，一年當中會有50幾日係33度以上嘅酷熱天氣，殊不知呢個預測喺舊年提早實現。睇番50年前，一年當中只有10幾日係酷熱天氣，數字足足升咗3倍呀！

林超英又自我反思，指過去講溫度將會上升幾多，其實係無意義，應該係話酷熱日數會飆升幾多，以及對健康嘅影響。佢話今年天氣咁熱，不但係一個警號，亦要注意盛暑之下，戶外工作到底點頂？尤其是從事掃街、擺檔或其他露天工程嘅工友，真係好「陰功」。對於最近有工會提出，中暑要列入工傷，林話社會必須認真咁看待呢個問題。佢又提出一個應對方法，考慮將戶外工作嘅時間調整為朝早同黃昏兩段，中午或日照最盛嘅時段就要停工。

至於上水、粉嶺等新界北區較市區熱嘅現象，林超英解釋話由於近來吹南風，假設海旁嘅尖沙咀係33度，往北吹嘅南風就會將沿途嘅陸地高溫一路推上去，所以新界北區係會熱過海旁地區2、3度。雖然海旁會較為涼快，但林超英勸喻置業人士，購入物業之前必須考慮樓盤距離海平面有幾高。因為地球暖化海水上升，預測目前50年一遇嘅高水位，去到本世紀末就會變成兩年一遇！地勢較低區域遇上惡劣天氣就好容易淪為澤國。佢話唔好以為住高樓層就會冇事呀，若果機房一旦被水淹浸，水泵停止運作，食水同沖廁水供應中斷，咁就無法居住啦。