政情：深港居民爆憤怒 議員接萬宗投訴

陳月明指毗鄰深港邊界嘅東北堆填區，自1995年運作以來，約20萬居民飽受空氣同水質污染嘅影響。尤其是近年堆填區批出擴建合約，問題更趨嚴重，已經收到逾3,000條網上評論投訴、逾900封電郵投訴；至於深圳羅湖區就有逾4,000戶投訴，香港打鼓嶺都有逾5,000人投訴堆填區問題。

就東北堆填區嘅問題，謝展寰話高度重視深港居民嘅意見，坦言港府對堆填區負有管理責任，佢表示將會加強管理同埋改革管理制度，又指由2021年9月開始，已透過深圳市生態環境局開展直接溝通機制，雙方就堆填區營運有定期監察數據同埋交換意見，並責成同事積極跟進堆填區可能存在嘅管理問題，歡迎社會大眾參與監督工作。

對於中長期嘅環境處理同規劃問題，陳月明認為應停用堆填區，改由離島建新嘅焚化爐處理垃圾，況且海上輸送垃圾仲可避免陸路運輸時所產生嘅二次污染。至於局方又點回應呢？陳話謝都認同要加快焚化設施嘅興建進度，未來香港應用焚化爐處理垃圾，盡量避免再用堆填區咁話。