政情：王冬勝寄語新一代 世界觀定成敗

王冬勝發言時引用美國加息嘅事例，話學生要思考吓有咩影響，例如供樓供多咗咁，又講到俄烏戰事會令食物價格提升。之不過，佢強調唯一做領袖唔會變嘅就係世界觀，年輕人要增長自己嘅視野，呢個世界要上位亦無捷徑，一定要勤力，最好對自己熟悉嘅嘢有專門研究。

講到喺銀行界亦見過好多人失敗，事關自信同自大只係一線之差，因為有啲人認為人哋做唔到嘅嘢，自己一定做到，但資金鏈一斷就出事。至於喺處理壓力方面，佢就有個新穎嘅睇法，話可以去做善事，回饋社會，因為有人會對你所做嘅事有感恩，心境會影響視野，而唔係淨係睇賺幾多錢。佢又希望學生多睇歷史，增加幾代人之間嘅溝通話題。

至於同場嘅民政及青年事務局副局長梁宏正，佢話青春係學生嘅財富，唔好怕嘥時間，可以去大灣區去累積經驗，睇呢個市場係咪啱自己發展，學到嘅經驗始終喺自己個袋度。