政情：議助疑似搖身變項目主任 孫東心腹人工升得甘？

據議員開支申報，孫東喺今年4月時，以月薪2.5萬元聘請一位名叫唐曉明嘅人士擔任議助，職位係行政主任，負責處理孫東喺立法會嘅事務。而政府電話簿上，一位人士中英文姓名寫法皆與孫嘅議助唐曉明一樣，正於創新科技及工業局擔任項目主任（局長辦公室），薪水亦倍增添。翻查紀錄，傳媒界亦有人叫唐曉明，同孫東嘅議助姓名相同。本報致電唐求證，對方承認在政府任職，但拒絕透露職位詳情。根據未重組前嘅創新及科技局招聘廣告，當時該職位以月薪58,635元起跳，最高可達93,710元。

之不過，請一個有經驗嘅議助都唔容易，唔單止要靠行內人士介紹，有議員亦都透過落廣告聘請議助。就好似屬同一工會嘅勞工界議員梁子穎同選委會界別嘅陸頌雄，佢哋就花咗2,240元喺報紙落3日廣告，應徵條件是不需工作經驗，但需守法自律，同時對勞工發展等有興趣。另一議員黃元山就選擇上網登足兩星期廣告聘請研究助理，用咗2,108元，最後有成47人遞交申請，534人瀏覽，睇嚟呢份工嘅吸引力亦相當大喎！