昔日東方政情：李鎮強黃元山 開孖頭議辦
新一屆立法會議員，無論係選委界別、還是功能界別，都同地區直選一樣，開設地區辦事處以融入社區工作。而議員之間「孖頭」開議辦亦成為潮流，最新消息係李鎮強同黃元山兩位選委界議員，就選擇到南區開設聯合地區辦事處，即將短期內開幕！
選址南區 兩人一拍即合
曾任東區區議員嘅李鎮強，開設地區辦事處都集中喺港島。佢指，現時自己喺灣仔有個辦事處，短期內會同黃元山「孖頭」喺南區增設另一個辦事處。李鎮強指，兩人早喺選舉期間就有交流、合作，認為黃元山嘅專長喺政策研究，自己就擅長執行，同埋具有地區經驗，於是兩人一拍即合。李又強調，兩人今次合作係以個人名義，而非兩人所屬政黨及智庫結盟。
至於點解選擇南區，李解釋，南區有自己黨嘅區議員，可以互相合作；而地辦選址附近較多基層，能夠提供更多服務畀佢哋，並將會喺呢幾日至下月初開幕。李又透露，未來或會喺港島區再開一個地辦。今次李鎮強同選委界議員合作，唔知下次會唔會同自己黨友開聯合地辦呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
