政情：委會主席塵埃落定陳振英財會擔正

傳出任副手易志明稱樂意接受

由於早前有4名議員「轉跑道」加入政府，加上今屆政府所任命嘅新一屆行政會議非官守成員當中包括幾位議員，導致立法會多個委員會主席出現變動。據悉，立法會各板塊喺上個禮拜傾掂數，各委員會嘅正、副主席人選已經塵埃落定，財務委員會主席由副主席陳振英坐正，財會副主席將會由航運交通界議員易志明擔任。

財委會主席陳健波被委任為新一屆行政會議非官守成員，佢早前話要兼顧行會同立法會職務，而辭去財務委員會主席一職。立法會秘書處尋日就發出信件，促請議員就財委會主席職位嘅人選作出提名。據了解，財委會副主席陳振英將會頂上、擔任財委會主席，而佢本身兼任嘅政府帳目委員會主席一職，就需要待陳振英成功「坐正」做財委會主席後，再由帳委會委員內部選出，聽聞議員邵家輝有意加入帳委會同埋競選主席。對於有傳易志明接任財委會副主席，佢回覆話如果大家支持，都樂意學習同接受嘅。

廖長江或出山掌司法委會

至於因麥美娟同張國鈞，分別加入政府擔任民政及青年事務局局長及律政司副司長，立法會房屋事務委員會同司法及法律事務委員會主席出現空缺。據聞，將會由工務小組委員會主席盧偉國兼任房屋事務委員會主席，建制派班長廖長江就會「出山」接掌司法及法律事務委員會主席。另外，據聞人事編制小組委員會副主席一職，就會由議員周浩鼎擔任喇！雖出現有議員同時擔任小組委員會同埋事務委員會主席，但新人依然冇份擔任主席。