政情：林琳13萬裝修辦公室添攝影棚

根據立法會議員申請發還開支文件顯示，先後有3間公司向林琳報價，其中一間公司以13.2萬元，成功價低者得，向佢提供攝影棚設備、器材採購同直播室設置，其中裝修佔5萬元，燈光器材要1.5萬元，而相機等就要超過3.7萬元。而林琳亦另外再購買直播燈架、用作拍攝嘅綠色屏幕等。

林琳接受查詢時就話間房嘅位置唔方便，所以改裝做拍片，亦會同黨友一齊用。但因為第5波疫情令裝修停頓，依家先用咗一個月，遲啲會加埋假樹同茶几，甚至考慮做清談節目，而依家已經喺嗰度拍咗幾條片喇，仲話大家要拭目以待佢新一條，為社福機構拍攝嘅牙醫服務片喎。

網上平台咁重要，同樣係選委會界別議員嘅陳月明亦唔執輸，用咗108元買咗微博會員，可以用足12個月，保持同網民嘅溝通。至於林筱魯就比較關注香港發展，喺書店用76元購入《基本法》同《維護國家安全法讀本》，而謝偉銓同吳永嘉就有閱報習慣，都分別用500元同700多元訂報紙。