政情：酷暑濕身再乾煎鄭泳舜三項鐵人

天文台呢幾日發出酷熱天氣警告，出街熱到火爐咁，但對於「鐵友」嚟講，濕完身再乾煎，幾難頂都會撐落去。乜嘢驅使議員鄭泳舜（Vincent）同政制及內地事務局前副局長陳岳鵬（Ronald）去參賽？

陳岳鵬參加分齡賽

尋日熱氣逼人，喺大美督有場三項鐵人賽。有玩開鐵人賽嘅Vincent都有落場，佢話由於尋日朝早好熱、好似攝氏35度咁，因為大美督要上斜落斜踩單車，比賽都有難度。佢仲話闊別比賽4年後，尋日重返賽場，佢形容係重拾番團火，而喺經歷咗4個月嘅備戰，工作中兼顧唔定期訓練嚟參賽，係好大挑戰。但喺過程中得到嘅，遠比結果更重要。

Ronald亦喺社區平台貼文，話仲有兩個月就轉4字頭，開始參加三項鐵人比賽去迎接人生另一階段喎。佢參加分齡賽，喺76個參加者中排第24，成績相當好，而佢都話OK，下次繼續努力。