政情：外遊3周歎無罩生活 黃傑龍每日食玩瞓

喺今次行程，Simon去咗日本一轉，再飛去加拿大。佢尋日喺社交平台貼文晒命話，過去3個星期旅行期間完全冇戴過口罩， 每日出街食飯周圍玩，唯一戴口罩就係返香港之前48小時要去做一次檢測。 佢發覺打咗疫苗後，病毒可能唔係傳說中咁容易傳播得咁誇張，最少佢3個星期冇戴過口罩都冇事，佢亦補充，明白運氣同經歷人人唔同，唔能夠比較。

外界批評政府防疫政策過緊，佢認為港府政策亦唔能夠話錯，問題係呢個唔係空氣傳播嘅伊波拉，打咗疫苗基本都係輕症，又話腸病毒可能仲勁過佢，成件事都係風險同成本問題，為咗經濟同民生，香港要盡快恢復正常生活。

佢尋日坐飛機抵港，形容幾經艱苦上到指定旅巴去檢疫酒店，事關落機後，要做申報、核酸及快測、發出隔離令，行路同無數次唔知點解要檢查隔離令，足足搞咗3小時，佢話咁複雜嘅程序喺3個鐘頭內搞掂，可見港府投放大量人力、物力，見到啲工作人員都做到幾辛苦，相對旅客嚟講，佢話當然都辛苦啦！