政情：室溫34.9度 林超英靠USB風扇降溫

林超英曾講用咗10年時間證明，唔開冷氣唔會死，亦講過可以用風扇製造氣流。佢尋日喺社交平台貼文，話喺屋企對住部電腦做嘢，仲感謝15cm嘅USB風扇製造氣流，佢話當時相對濕度60%左右。喺佢上載嗰張相見到溫度計顯示34.9度呀！點頂呀？有網友隨即諗起劏房同蝸居嘅基層市民，問有冇將呢個降溫方法畀政府？叫坐喺冷氣房嘅官員去解決劏房戶嘅問題，而林亦回應話有，仲話鼓勵社福機構幫劏房戶安裝低耗能嘅氣流裝置，為劏房通氣添！

唔少網友亦教路點降溫，例如到咗夜晚涼咗，去到27度左右，配合冷風機，可再下降多一至兩度；亦有網友話開門窗、廚廁長開抽氣扇，咁客廳開部循環扇都得嘞！有網友對呢個方法大表贊同，話佢屋企都冇開冷氣，鼓勵用風扇加開窗對流。