昔日東方政情：葉劉預咗美國制裁 叫港府送夾萬
美國已制裁部分港府官員，而美國國會及行政當局中國委員會（CECC）嘅12名跨黨派國會議員早前更去信美國總統拜登，要求拜登運用總統權力制裁香港律政司同自願參與政治案件嘅檢控官，隨即被中國駐美國大使館批評，港府亦提出譴責。身兼行政會議召集人嘅立法會議員葉劉淑儀尋日出席書展活動時，亦批評美國無理針對香港，又話佢已有心理準備會被制裁。
點解會講到美國制裁呢個話題？事關同場嘅另一行會成員話如果美國要制裁嘅時候，美國只會制裁個別人士，仲叫葉劉要小心，因為佢係行會召集人，佢可能係下一個被制裁嘅人。
自稱退休已無求
葉劉回應時表明已有心理準備被制裁，話：「至多咪叫特區政府送個夾萬畀我」，佢又反問有咩理由香港一個彈丸之地，會威脅到美國嘅國家安全呢？佢又話：「所以香港有好多人話，我哋嘅國家安全法含糊、廣泛，你先睇吓美國、隨佢講嘅，香港令到美國進入緊急狀態，係咪太好笑？唔係好笑，只係覺得好離譜。」佢又形容自己係退休人士，已無求，只係喜歡工作。
話時話，前特首亦被美國制裁，冇銀行帳戶，每月出糧只係用現金，亦曾經透露喺禮賓府積放大量現金。
盼香港盡快通關
對於防疫抗疫方面，佢話目前最重要係通關，金融界做生意需要外遊，即使未能同內地免檢疫通關，亦可以先對外通關，盡量減低對旅行嘅障礙，畀金融產業發展得更好。被問及近期唔少人移民離港，佢話已見慣過去多次人才流失，唔覺得擔心，離開唔緊要，最重要會回流同不斷有人才來港，佢相信待疫情穩定，政府陸續放寬對外交往，好多人會返嚟。
佢所屬嘅政黨有3名黨員近日獲政府委任為政治助理，包括勞工及福利局嘅傅曉琳、創新科技及工業局嘅廖添誠同運輸及物流局嘅陳閱川，佢哋尋日都有去書展撐場，而葉劉亦話佢啲資深議員助理快將「清零」，會招募新丁入伍，繼續開班訓練人才。
被問到民主黨係咪需要調整路線甚至解散，佢就話中央已明確表明對政制發展的看法，一定要愛國者為治港核心，參與管治一定要支持國家主權、安全、發展利益；任何政黨要繼續參與，一定要符合標準。佢認為有空間容納唔同政見人士，但政黨要自行決定走甚麼路線。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
