政情：潘國山帶隊搜捕 斷野豬米路

潘國山解釋，係因為該處嘅野豬，通常喺夜幕降臨之時出嚟「開餐」，至於食物來源，通常係摷垃圾桶、或者附近居民嘅殘羹剩食，換言之，有人餵野豬囉。而當日，佢哋就見到5隻野豬，都係唔多怕人，好似「見慣世面」咁。潘又話，雖然房屋署已經喺山坡同通道之間架設鐵絲網，然而野豬竟懂得喺鐵絲網同雨水渠之間嘅空隙出入，真係防不勝防。雖然漁護署對付野豬，係先捕捉後絕育，但當日礙於麻醉師不足，要改日先至有行動。

雖然上址未有野豬傷人嘅報告，不過潘國山話附近有幼稚園，安全方面不能掉以輕心；況且野豬隨地排泄，影響衞生，而山坡又有原居民墓地，盛有先人骸骨嘅金塔會被野豬破壞，因此控制野豬係大有理由，而佢亦同意修例，將禁止餵飼野生動物嘅做法，由郊野公園擴展至全港範圍。至於捕殺，佢認為係最直接嘅手段，然而民居地帶並不適宜，更何況，是否重啟野豬狩獵隊亦頗多爭議。