政情：立會防疫抖暑 職安健修例未傾得住

話說法案委員會喺6月17日召開第一次會議，但後續會議則3次改期。其中一次係因為議員黃國喺上周四進行快測後確診。鑑於黃國同相關法案委員會主席陸頌雄屬同一個工會，兩人喺立法會綜合大樓嘅辦公室又屬同一樓層，為防互相傳染都係小心為上，會議延期舉行。之但係，有訪客喺本周三到訪陸頌雄嘅辦公室，其後該訪客確診，雖然陸冇染疫。安全起見，會議再次延遲舉行啦。

至於該交付審議嘅條例草案則醞釀多年，且相當有爭議性。政府早喺2019年提出初步建議，2020年再提出修訂建議，但總係搞唔掂。直到今年5月提交議會討論，而立法會就成立法案委員會審議，勞工背景嘅議員都磨拳擦掌，想盡快通過。據悉，商界背景嘅議員寧願放棄主席位置，以爭取發言機會，結果委員會主席由陸頌雄擔任。

對於今次修例，政府說法係嫌職安健罪行判刑普遍偏低，未能產生足夠阻嚇力，認為要平衡勞資雙方利益，包括修訂《工廠及工業經營條例》同埋《職業安全及健康條例》以及附屬法例。法案建議涉及極嚴重職安健違法行為嘅罪行可交由較高層級嘅法院審理，最高罰款額增至1,000萬元，最高監禁刑期兩年。

但睇番過往一眾委員嘅說法，有人認為單靠提高罰則，並唔可以避免發生工業意外，反而要求政府做好宣傳同教育工作喎。唔單止咁，亦有委員認為僱主同僱員同樣有責任。

無論如何，始終都需要開到會先有得傾，反而有時想趕工，都唔一定真係推動到事情嘅進展嘅！