政情：食苦瓜驅蚊 陳曼琪親證冇乜可能

事後Maggie將雙腿畀蚊咬到花晒嘅相片上載社交平台。佢話炎炎夏日穿上薄裙的確涼快，但棄穿長褲嘅結果，就係一路派福袋一路畀蚊咬，雖然有街坊即場幫佢噴蚊怕水，然而吸血蚊亦已飽食遠颺。Maggie又話，佢童年時聽長輩講，食苦瓜可驅蚊，結果自此之後，佢就開始食苦瓜喇！然而經過尋日一役，佢就不免懷疑長輩嘅說話，但無論如何，Maggie話苦瓜都係一種健康嘅食材。

至於Maggie到慈雲山派福袋，是否打算喺該區重設辦事處呢？佢話已經籌備開設幾個辦事處，大概10月開張，但就唔透露地點，話要賣個關子，但就一定唔單止服務慈雲山。