政情：馬逢國搭舢舨 撈垃圾有板有眼

馬逢國表示，早前喺大澳開設嘅聯絡處積極協助漁民申請公共資源。鑑於依家已踏入休漁期，好多漁民都賦閒在家，因此聯同佢哋一齊進行優化海洋生態嘅項目，藉此清理棄置喺大澳海面嘅魚網同海上垃圾。馬逢國指自己當日都有親身體驗，參與海面清理一至兩個鐘，從而收集數據，以及了解棄置魚網同海上垃圾問題嘅嚴重性，方便日後制定相關議題嘅政策同方案。

喺清理活動之後，馬逢國就將當日參與海上清理嘅相片上載社交平台。相中可見立足於舢舨嘅佢身穿救生衣，手持打撈工具將海上垃圾撈起，跟手將一袋二袋垃圾搬上岸，睇落「收穫甚豐」，亦反映海上垃圾污染問題，已達到無法忽視嘅地步。