政情：張宇人：開會頻撞期 累出席率顧此失彼

張宇人事後就解釋，主要原因係該委員會嘅會議時間，同其他會議時間相撞。至於身兼行會成員嘅鄉議局功能界別議員劉業強，就因行會撞期及身體不適，以致6次民政事務委員會會議當中，缺席兩次，出席率約為67%。

財經事務委員會至今共開過6次會議，張缺席嘅包括有1月25日、5月3日及7月4日嘅會議。佢解釋指，前兩次均為星期二，撞正行會開會時間；第3次缺席則因為與《2022年醫生註冊條例（修訂附表1A）（第2號）公告》小組委員會會議撞期，而自己係小組主席，必須出席。

張宇人強調，自己唔會無故缺席，若非撞期，否則必定盡量出席每個會議，而事實上，喺7月4日嗰日更出席咗兩個會議。而劉業強之所以兩次缺席民政事務委員會，皆因1月25日同行會撞期，6月13日感到身體不適，未有出席會議，及後進行核酸檢測後證實確診。