政情：食環執屍隊人手荒 促加薪吸新血入行

其實兩年前疫情爆發，Holden已經為處理隊發聲，事關佢哋喺工作安全保障不足嘅情況下，有機會接觸到染有新冠肺炎嘅遺體。當時Holden嘅黨友，時任議員梁志祥亦都指出，屍體處理隊只屬於二級工人，即使每月獲發特別津貼，依然係「人工低、待遇差」，擔心薪酬待遇欠佳會導致缺乏新血入行，而當現役嘅隊員退休後，一旦發現屍體搵邊個處理呢？

雖然議員呼籲政府正視問題，但食環署喺前年12月致函立法會公務員及資助機構員工事務委員會，就指過去數年，食環署招聘二級工人擔任屍體處理隊嘅工作並無困難，亦無挽留人手嘅問題；強調食環署一直有檢視屍體處理隊嘅人手情況，又話處理隊當時並無空缺。

之不過，今日嘅實際情況又係點呢？雖然喺架構上，處理隊同過往一樣，有14名工目同57名二級工人，然而截至今年6月中，因受到年初嘅第5波疫情影響，全港需移送嘅遺體逾萬具，數字較往時高出一倍，對於人手薄弱嘅處理隊而言，實在無法應付。更何況，當外判工下班後，處理隊需接手移走動物屍骸，有時仲要協助善後交通意外現場，如清理路面油漬，掃玻璃碎等，工作可謂相當繁重。

鑑於年初因疫情而驟增嘅遺體數量，據悉當局曾聘外判工幫手，但已於5月解散。處理隊二級工人月薪起薪點13,730元，外判工日薪千元無疑較優，以致外判隊伍中，不乏年輕力壯嘅人士。反觀依家嘅處理隊，好多人年逾半百，當中更有年屆花甲嘅公務員「翻閹」加入。處理隊隊員由於年紀偏大，體魄方面不但遠遜後生仔，仲有人每日都需要服食處方藥物。處理隊隊員將有大批退休嘅情況，實在不難預見。

因應處理隊沉重嘅工作量，以及面對隊員老化、乏人應聘嘅問題，Holden認為應將隊員屬於二級工人嘅待遇，提升至一級工人嘅水平，起碼薪酬提升咗，亦有助新血嘅加入。由於改變職級薪酬並非食環署可處理嘅範疇，所以Holden尋日去信公務員事務局局長楊何蓓茵，要求檢視同調整屍體處理隊嘅職系架構同人手編制，包括提升待遇、增加誘因吸引新人入行，紓緩人手短缺。