政情：葛珮帆落邨 籲改善長者居家安全

美林邨有逾40年歷史，公屋設施比較舊式。該長者夫婦話想喺單位加裝扶手，但原來要職業治療師證明，申請手續又繁複。坐輪椅想入廚房、廁所或者出門都被門檻阻住，好唔方便，想移除門檻又話會違反消防安全條例。EQ建議政府簡化程序，喺公屋單位全面落實無障礙設施，加裝扶手、活動斜台、平安鐘等，同埋加設長者健體設施等，可以照顧得長者更好一啲。

公公婆婆仲話不時帶孫仔女去屋邨遊樂場玩，所以跨代共融嘅康樂設施尤為重要。佢哋探訪嘅3人家庭都話希望全面優化遊樂場設施，令設施與時俱進，更多元化同更具挑戰性。何永賢同EQ跟住就去咗視察有關設施，何仲親自試玩滑步機同推手器。佢話今次落區探訪畀到佢好多靈感，日後工作會循建設跨代共融嘅遊樂設施方面落手，會再更新公屋設施。